Heartbeat Unlock: શું તમે વારંવાર પાસવર્ડ ભૂલી જાવ છો? હવે ચિંતા છોડો! વૈજ્ઞાનિકોએ Vital ID નામની નવી ટેકનોલોજી શોધી છે, જે તમારા દિલના ધબકારા અને શ્વાસની લય પર કામ કરે છે. જાણો આ અનોખી સિસ્ટમ વિશે વિગતે..
Vital ID Technology News: આજના ડિજિટલ યુગમાં આપણે ડઝનબંધ પાસવર્ડ અને પિન યાદ રાખવા પડે છે. ક્યારેક ફિંગરપ્રિન્ટ સ્કેનર બરાબર કામ નથી કરતું, તો ક્યારેક ફેસ આઈડીમાં સમસ્યા આવે છે. પરંતુ વિચારો કે જો તમારો ફોન માત્ર તમારા શ્વાસ લેવાથી કે દિલના ધબકારાથી અનલોક થઈ જાય તો? સાંભળવામાં આ કોઈ સાયન્સ ફિક્શન ફિલ્મ જેવું લાગે, પણ હકીકતમાં વૈજ્ઞાનિકોએ આ દિશામાં મોટી સફળતા મેળવી છે.
વૈજ્ઞાનિકોએ એક એવી નવી ટેકનોલોજી શોધી કાઢી છે જે તમારા શરીરના વાઈટલ્સ એટલે કે દિલના ધબકારા અને શ્વાસની હિલચાલના આધારે ડિવાઈસને લોક કે અનલોક કરી શકે છે. આ નવી પદ્ધતિને Vital ID નામ આપવામાં આવ્યું છે.
શું છે આ Vital ID ટેકનોલોજી?
ન્યૂ જર્સી ઇન્સ્ટિટ્યૂટ ઓફ ટેકનોલોજી, ટેમ્પલ યુનિવર્સિટી અને ટેક્સાસ A&M યુનિવર્સિટીના સંશોધકોએ સાથે મળીને આ સંશોધન કર્યું છે. આ ટેકનોલોજી વિશેની માહિતી તાજેતરમાં 2025 ACM કોન્ફરન્સ ઓન કોમ્પ્યુટર એન્ડ કોમ્યુનિકેશન સિક્યોરિટીમાં રજૂ કરવામાં આવી હતી.
Vital ID મુખ્યત્વે આપણા શરીરમાં થતા કુદરતી વાઈબ્રેશન પર કામ કરે છે. જ્યારે આપણે શ્વાસ લઈએ છીએ કે આપણું હૃદય ધબકે છે, ત્યારે તેનાથી ખૂબ જ સૂક્ષ્મ વાઈબ્રેશન પેદા થાય છે. આ ધ્રુજારી ગરદન દ્વારા મગજ સુધી પહોંચે છે. દરેક વ્યક્તિના હાડકાંની બનાવટ અને ટિશ્યુ અલગ-અલગ હોવાથી, આ વાઈબ્રેશન પણ દરેક વ્યક્તિ માટે યુનિક હોય છે. બસ, આ જ યુનિકનેસનો ઉપયોગ Vital ID તમારી ઓળખ સાબિત કરવા માટે કરે છે.
કોઈ નવા હાર્ડવેરની જરૂર નહીં
સામાન્ય રીતે કોઈ પણ નવી ટેકનોલોજી આવે ત્યારે આપણને એવું લાગે કે નવો ફોન ખરીદવો પડશે. પરંતુ Vital ID ની સૌથી મોટી ખાસિયત એ છે કે તેના માટે ફોનમાં કોઈ ખાસ ફેરફાર કરવાની જરૂર નથી. તે સ્માર્ટફોન કે ટેબ્લેટમાં પહેલેથી જ રહેલા મોશન સેન્સર્સ (Motion Sensors) નો ઉપયોગ કરે છે. આજના સમયમાં લગભગ તમામ પ્રીમિયમ ફોનમાં આ સેન્સર્સ હોય જ છે. માત્ર એક સોફ્ટવેર અપડેટ દ્વારા આ સિસ્ટમને સક્રિય કરી શકાશે. શરૂઆતમાં આ ટેકનોલોજીને એક્સટેન્ડેડ રિયાલિટી (XR) હેડસેટ માટે ડિઝાઈન કરવામાં આવી છે.
કેટલી ભરોસાપાત્ર છે આ સિસ્ટમ?
કોઈપણ સિક્યોરિટી સિસ્ટમ માટે તેની સચોટતા સૌથી મહત્વની હોય છે. સંશોધકોએ 10 મહિના સુધી 52 લોકો પર આ ટેકનોલોજીનું પરીક્ષણ કર્યું હતું. આ ટેસ્ટિંગમાં આશ્ચર્યજનક પરિણામો મળ્યા છે:
95% એક્યુરેસી: સિસ્ટમે 95 ટકાથી વધુ વખત સાચા યુઝરને ઓળખી લીધા હતા.
98% રિજેક્શન રેટ: અનવેરિફાઈડ એટલે કે અજાણ્યા યુઝર્સને સિસ્ટમે 98 ટકા કિસ્સામાં એક્સેસ આપવાની ના પાડી દીધી હતી. રિસર્ચરે એક ખાસ ફિલ્ટરિંગ સિસ્ટમ પણ તૈયાર કરી છે જે માથું હલાવવા કે અન્ય શારીરિક હલચલને કારણે આવતા અવરોધોને દૂર કરે છે. એટલે કે, ડિવાઈસ માત્ર તમારા ધબકારા કે શ્વાસના વાઈબ્રેશન પર જ કામ કરશે.
ભવિષ્યમાં શું બદલાશે?
જો આ ટેકનોલોજી વ્યાપક સ્તરે અમલમાં આવશે, તો પાસવર્ડ લખવાની કે વારંવાર સ્ક્રીન પર આંગળી ઘસવાની જરૂર નહીં રહે. વિવિધ એપ્સ અને વેબસાઈટ્સમાં લોગ-ઈન કરવાની રીત સંપૂર્ણપણે બદલાઈ જશે. સુરક્ષાની દ્રષ્ટિએ પણ આ ટેકનોલોજી ફિંગરપ્રિન્ટ કે ફેસ આઈડી કરતા વધુ સુરક્ષિત સાબિત થઈ શકે છે, કારણ કે દિલના ધબકારાની નકલ કરવી અશક્ય છે. ટૂંકમાં કહીએ તો, હવે તમારી ઓળખ તમારા અવાજ કે ચહેરા સુધી સીમિત નથી, પણ તમારા ધબકારામાં છુપાયેલી છે.